భూతప్రేతపిశాచాది బాధలు తొలగుటకు, రోగములు మరియు ఎటువంటి కష్టములైనా తొలగుటకు, అభీష్టసిద్ధికి ఆంజనేయ ప్రదక్షిణములు సుప్రసిద్ధములు. దేవాలయమునందు కానీ లేదా హనుమంతుని యంత్రమును గాని, హనుమత్ విగ్రహమును లేదా పటమునైనా ఇంటివద్ద పెట్టుకొని ప్రదక్షిణము చేయవచ్చు. పుష్పాదికమును, వక్కలను, పసుపుకొమ్ములను గణనకు తీసుకొని గణన చేయడం శ్రేష్ఠం.
శ్రీహనుమాన్ జయహనుమాన్ జయజయ హనుమాన్! ఆంజనేయం మహావీరం బ్రహ్మవిష్ణుశివాత్మకం! తరుణార్క ప్రభం శాంతం రామదూతం నమామ్యహం!! మర్కటేశ మహోత్సాహ సర్వశోక వినాశన! శత్రూన్ సంహర మాం రక్ష శ్రియం దాపయ మే ప్రభో!!
అని పఠిస్తూ ప్రదక్షిణములు చేయవలెను. భక్తి శ్రద్ధలతో చేతులు జోడించుకొని, పరుగులిడక నమ్రులై ప్రదక్షిణము చేయాలి. మధ్యలో మాట్లాడరాదు. స్నానాదికములు నిర్వహించి శుచులై చేయవలెను. 108 కానీ, అందులో సగము కానీ లేదా 5 కానీ, దీనితో గుణించబడిన సంఖ్యతో కానీ చేయవచ్చు. నిండుచూలాలు నడుచునట్లు ప్రదక్షిణ చేయాలి. ఈవిధంగా ప్రదక్షిణలు చేసిన వారికి హనుమంతుడు అనుగ్రహించి కోరికలు తీర్చుతాడు.
సర్వేజనా సుఖినో భవంతు
Comments
Post a Comment